கூகுள் நிறுவனத்தின் அடுத்த பிரமாண்ட படைப்பு.


Google Glass : வேண்டுமென்றே எதிர்பார்ப்பை எக்கச்சக்கமாக கிளறிவிட்டு அலைக்கழிக்கும் கூகுள் நிறுவனத்தின் அடுத்த பிரமாண்ட படைப்பு.

இப்போது யூடியூப்பில் சூடுபிடித்திருக்கும் புதிய வீடியோ கூகுள் கிளாஸ் மூலம் எதையெல்லாம் பார்க்க முடியும், எப்படி பார்க்க முடியும் என காண்பிக்கிறது.

மேலும் கூகுள் கிளாஸ் மூலம் எப்படி மின்னஞ்சல் அனுப்புவது, எப்படி படம் எடுப்பது, எப்படி Voice Commands ற்கு பதில் அளிப்பது, எப்படி குறுஞ்செய்தி அனுப்புவது என அனைத்தையும் நுனிப்புல் மேயும் மேலோட்டமாக அலசுகிறது இந்த வீடியோ.

ஆனால் உண்மையில் எப்படித்தான் இந்த கூகுள் கிளாஸ் வேலை செய்யப்போகிறது, அதன் புரோகிராம் என்ன? என்பது குறித்தோ, அல்லது எப்போது இவை சந்தைக்கு வரப்போகின்றன?, ஒரு கூகுள் கிளாஸின் விலையென்ன என்பது குறித்தோ எந்த தகவலும் வெளியிடவில்லை.

மாறாக கூகுள் கிளாஸின் சில பயனுள்ள புதிய நன்மைகளை பட்டியலிடுகிறது. உதாரணமாக கம்ப்யூட்டரில் வீடியோ சேட்டில் இருக்கும் ஒருவருக்கு உங்களது கூகுள் கிளாஸ் மூலம் நீங்கள் எதை பார்க்கிறீர்களோ அதை காண்பிக்க முடியும்.

அதோடு ஒரு காட்சியை பார்த்துக்கொண்டிருக்கும் போதே, அதன் அழகு பற்றி கணணித்திரையில் உள்ள ஒருவருக்கு கேள்வி எழுப்ப முடியும். அவர் குரல் வழியாக பதில் அனுப்புவார்.

வாகனம் ஓட்டிக்கொண்டிருக்கும் போதே இவை அடுத்து எங்கு, எப்போது திரும்ப வேண்டும் என சொல்லிவிடுகின்றன.

நீங்கள் ஒரு வீடியோ பதிவு கூட கூகுள் கிளாஸ் மூலம் செய்ய முடியும். இப்போது வானிலை நிலவரம் என்ன என குரல் வழிக் கேள்வி எழுப்பினீர்கள் எனில் கூகுள் கிளாஸ் தனது திரையில் காண்பித்துவிடுகிறது.

ஐந்து நிறங்களில் இந்த கூகுள் கிளாஸ் அறிமுகப்படுத்தப்படவுள்ளது. ஆனால் ஐந்தும் பக்கா ஸ்டைலிஷ் கண்ணாடிகள். சொல்வதெல்லாம் சரி! எப்போது கண்ணுல காட்டப்போறீங்க?

கூகுள் கிளாஸ் திட்டத்திற்கு எந்தளவுக்கு மரியாதை இருக்கிறதோ, அந்தளவுக்கு எதிர்மறை விமர்சனங்களும் குவிகின்றன. இவ்வளவு நாட்களும் கணணியில் மாத்திரம் தான் நாம் எது செய்தாலும் கூகுள் கண்காணித்துக்கொண்டிருந்தது. இப்போது நாம் எங்கு செல்கிறோம், எதை பார்க்கிறோம் என்பதை கூட மிக அந்தரங்கமாக கூகுள் தலைமைகள் தெரிந்துகொள்ளப்போகின்றன என்கிறார் ஒருவர்.

இனிமேல் சாலைகளில் ஏற்படும் விபத்துக்களில் முக்கிய பங்கு கூகுளுக்கு சென்றடையும் என்கிறார் மற்றொருவர். எதையும் தேடிப்பெறும் ஆர்வம் அற்றுப்போய் மனிதர்களை சோம்பேறிகளாக்க கூகுள் கிளாஸ் நிச்சயம் உதவப்போகிறது என்கிறார் இன்னுமொருவர்.

இந்நிலையில் கூகுள் நிறுவனம் இப்போது செய்திருக்கும் அறிவிப்பு ஒன்று பற்றியும் பலர் கவனத்தை திருப்பியிருக்கிறார்கள். ‘கூகுள் கிளாஸ் உங்களுக்கு கிடைத்தால் அதன் மூலம் நீங்கள் பிரயோசனமாக என்ன செய்ய விரும்புகிறீர்கள் என  50 சொற்களுக்குள் எழுதுங்கள், 15 செக்கன்களில் ஒரு வீடியோ அனுப்புங்கள், 5 புகைப்படங்களை எடுத்து அனுப்புங்கள்.உங்கள் திட்டம் வித்தியாசமானதாக இருக்குமாயின் 1,500 அமெரிக்க டாலர் பெறுமதியான Glass Project Explorer Kit உங்கள் கைகளுக்கு கிடைக்கும். அதாவது நியூயோர்க், லாஸ் ஏஞ்சல்ஸ், சான் பிரான்ஸிஸ்கோ இம்மூன்று நகரங்களில் ஒன்றில் நீங்கள் கேட்டு வாங்கிப்பெறலாம். கூகுள் கிளாஸ் திட்டத்தை எப்படி இன்னமும் மேம்படுத்தலாம் என எமக்கு உதவுங்கள் என்கிறது’ அந்த அறிவிப்பு.

Click here  வீடியோ

 

மன்னித்துவிடு பாலச்சந்திரன்


 

Balachandran-1_CI-12009 ஆரம்ப நாட்கள் ஈழப்போர் உச்சத்தில் இருந்த நேரம். அங்கிருந்து வரும் புகைப்படங்கள் விடீயோக்கள் போரின் கொடூரத்தை சொன்னது. அதில் கர்ப்பிணி ஒருவரின் வயிறு கிழிந்து அவரின் சிசுவின் பிஞ்சு கால் விரல்கள் வெளியே தொங்கிக்கொண்டிருந்த புகைப்படம் ஒன்றும் இருந்தது.
என்னால் மறக்கவே முடியாத படம் அது. அப்போது என் மனைவியும் எழுமாத கர்ப்பிணியாக இருந்தார். அதனாலயே என்னை அந்தப் படம் மிகுந்த சித்திரவதைக்குள்ளாக்கியிருந்தது. அந்த சிசுவின் கால்விரல்கள் பிறந்திராத என் குழந்தையாக என்னைச் சித்திரவதை செய்தது.
இன்றளவும் சிலபேர் மீது எனக்கு வன்மம் குறையாமல் இருப்பதற்கு அந்தப் படமும் ஒரு காரணம்.
இனிமேலும் தொடர்ந்து ஈழத்திலிருந்து வரும் புகைப் படங்களைப் பார்த்தால் மனப்பிறழ்வுக்குள்ளாகிவிடுவோம் என்ற அச்சத்தின் காரணமாக அவைகளைப் பார்ப்பதை தவிர்த்துவிடுவேன்.
சில மாதங்களுக்கு முன்பு மார்பில் துப்பாக்கியால் சுடப்பட்டுக் கொல்லப்பட்ட பாலச்சந்திரனின் படம் வெளியாகியிருந்தது. இப்போது சுட்டுக்கொல்லப்படுவதற்கு முன் உயிரோடு இருக்கும் பாலச்சந்திரனின் படம் வெளியாகியிருக்கிறது.
தன்னைச் சுற்றி என்ன நடக்கிறது.. தனக்கு என்னாகும் என்பது பற்றியெல்லாம் ஏதும் அறிந்திராத அந்தப் பாலகன் ராணுவம் கொடுத்த பிஸ்கெட்டை சாப்பிட்டுக்கொண்டிருக்கிற அந்தப் புகைப்படத்தை பார்த்த தருணத்திலிருந்து 2009 காலகட்டங்களில் ஏற்பட்ட மன உளைச்சல் இன்று வந்தது. கொல்லப்பட்ட பாலச்சந்திரனின் படத்தை விடப் பிஸ்கெட் சாப்பிட்டுக்கொண்டு உயிரோடு அமர்ந்திருக்கும் இந்தப் படம் எனக்கு மிகுந்த வலியை கொடுக்கிறது..
அதுவும்.. அந்த வெறித்தக் கண்கள்… பாவிகளே.. எப்படி மனசு வந்தது.. அந்த குழந்தையை சுட்டுக்கொல்ல..
ஒரு சிறுவனைக்கூட விட்டு வைக்க முடியாதளவுக்கு வன்மத்தோடு இருக்கும் ஒரு இனவெறி அரசுடன் தமிழர்கள் சேர்ந்து வாழ வேண்டும் என்று இப்போதும் கூறி அறிவுஜீவிகள் சிலர் தங்கள் வாழ்வை செழிப்பாக்க கூடும்.
தலைவர் வருவார்.. ஐந்தாம் கட்ட ஈழப்போர் வெடிக்கும்.. என்று செத்துப்போன உங்களை வைத்து சிலர் பிழைப்பும் நடத்தக்கூடும்.
தம்பி.. உன் தந்தையிடம் சொல்.. இவர்களுக்கு மத்தியில் நாம் தமிழர்களாகப் பிறந்ததே அசிங்கம் என்று..
மன்னித்துவிடு பாலச்சந்திரன்.. 
நாங்கள் கையாலாகாத தமிழர்கள்.. 
நன்றி:  கார்ட்டூனிஸ்ட்.பாலா

சிங்கள எம்.பிக்கு எதிராக ஆர்ப்பாட்டம் : நாம் தமிழர் 12 பேர் கைது


சிங்கள எம்பி ஆர்.கே.பி. கேமேஜ்,  சீர்காழி அருகே உள்ள திருக்கடையூரில் ஆலய தரிசனம் செய்ய வந்தார்.  அப்போது அவர் ஆலய விடுதியில் தங்கியிருந்தார். இதை அறிந்த திமுக, மதிமுக, விடுதலை சிறுத்தைகள் கட்சியினர் விடுதி முன்பு திரண்டு எம்பிக்கு எதிர்ப்பு தெரிவித்து ஆர்ப்பாட்டத்தில் ஈடுபட்டனர்.

 சிங்கள எம்பிக்கு கடும் எதிர்ப்பு நிலவியதால் திருக்கடையூரில் பலத்த போலீஸ் பாதுகாப்பு போடப் பட்டுள்ளது.   அவர் காரில் இருந்து புறப்பட்டபோது, காரை நோக்கி கற்களை வீசி எதிர்ப்பை தெரிவித்தனர்.

 இந்நிலையில் அவர் தற்போது திருச்சி எஸ்.ஆர்.எம். ஓட்டலில் தங்கியிருக்கிறார்.  இதையடுத்து நாம் தமிழர் கட்சியின் திருச்சி மாவட்ட பொருப்பாளர் பிரபு தலைமையில் ஓட்டலை முற்றுகையிட்டு ஆர்ப்பாட்டம் நடத்தினர்.   ஓட்டலின் மீது முட்டைகளை வீசி  எதிர்ப்பை தெரிவித்தனர்.

இதனால் நாம் தமிழர் கட்சியினர் 12 பேர் போலீசாரால் கைது செய்யப்பட்டனர்.

திருச்சி ஓட்டலில் கருணா தங்கியிருக்கிறாரா? : தமிழர்கள் கொந்தளிப்பு


சிங்கள எம்பி கருணா ரத்னா ஜெயசூர்யா, சீர்காழி அருகே உள்ள திருக்கடையூரில் ஆலய தரிசனம் செய்ய வந்தார்.  அங்கேயே அவருக்கு கடும் எதிர்ப்பு நிலவியது.

இதையடுத்து அவர், மனைவி மற்றும் உறவினருடன் திருச்சி  எஸ்.ஆர்.எம். ஓட்டலில் தங்கியிருக்கிறார்.  இந்த ஓட்டலுக்கு அருகில் இலங்கைத்தமிழர்கள் முகாம் உள்ளது.  அவர்களுக்கு,  விடுதலைப்புலிகள் இயக்கத்தில் இருந்து விலகி, சிங்கள அரசிடம் சென்று, ஈழத்தமிழர்களின் துரோகி என்றழைக்கப்படும் கருணா வந்துவிட்டார் என்று தகவல் சென்றிருக்கிறது.

இதையடுத்து முகாமில் இருந்த இலங்கைத்தமிழர்கள் ஆவேசத்துடன் எஸ்.ஆர்.எம். ஓட்டலுக்குள் நுழைந்தனர்.  பின்னர் ஓட்டல் நிர்வாகத்தினரும்,  போலீசாரும் வந்து, இது அந்தக்கருணா இல்லை.   எம்.பி. கருணா ரத்னா ஜெயசூர்யா வந்துள்ளார் என்று கூறவே, பின்னர் சமாதானம் அடைந்தனர்.

 இருப்பினும், இலங்கையிலும் இங்கேயும் இப்படி நாங்கள் அவதிப்படுகிறோம்.  இதற்கெல்லாம் காரணம் சிங்கள அரசுதானே என்று சிங்கள எம்.பி. தங்கியிருந்த ஓட்டலை பார்த்து தாக்க முற்பட்டனர்.

மாணவி பலாத்காரம் : ஆசிரியருக்கு வலைவீச்சு


கயத்தாறு தெற்கு மயிலோடையை சேர்ந்தவர் மரியா (வயது 16, பெயர் மாற்றப்பட்டுள்ளது). அங்குள்ள பள்ளியில் பிளஸ்-1 படித்து வருகிறார். அதே பகுதியை சேர்ந்தவர் ஆசீர்வாதம் (26), ஆசிரியர் பயிற்சி முடித்துள்ளார்.

மரியாவும், ஆசீர்வாதமும் காதலித்து வந்தனர். கடந்த 14-ந்தேதி மரியா வீட்டிற்கு சென்ற ஆசீர்வாதம் அவரை திருமணம் செய்து கொள்வதாக ஆசைவார்த்தை கூறி கற்பழித்து விட்டார்.

இந்த நிலையில் மரியாவை திருமணம் செய்து கொள்ள ஆசீர்வாதத்தின் தாய் சம்மதிக்கவில்லை. இதனால் அவர் மரியாவை திருமணம் செய்ய மறுத்து விட்டார்.

இது குறித்து கயத்தாறு போலீசில் புகார் செய்யப்பட்டது. போலீசார் விசாரணை நடத்தி ஆசீர்வாதத்தை வலைவீசி தேடி வருகின்றனர்.

குடிக்க பணம் தர மறுத்ததால் மனைவியை வெட்டி கொன்ற கணவன் கைது


கேரள மாநிலம் மலப்புரம் மாவட்டம் பரப்பனங்காடி அருகேயுள்ள தேடங்குளத்தை சேர்ந்தவர் சாஜி. கூலித் தொழிலாளி. இவரது மனைவி ஷைனி (வயது 36). குடிப்பழக்கம் உள்ள சாஜி அடிக்கடி குடித்து விட்டு ரகளை செய்வார்.

இதனால் கணவன் – மனைவி இடையே அடிக்கடி தகராறு ஏற்பட்டது. இந்த நிலையில் சாஜி “எனக்கு குடிக்க பணம் வேண்டும்” என்று ஷைனியிடம் நச்சரித்தார். “குடிக்க பணம் தர முடியாது, ஒழுங்காக வேலைக்குச் செல்லும் வழியைப் பார்” என்று எச்சரித்தார்.

இதனால் சாஜி ஆத்திர மடைந்து வீட்டில் கிடந்த அரிவாளை எடுத்து ஷைனியை சரமாரியாக வெட்டினார். இதைத்தடுக்க வந்த ஷைனியின் தாயாருக்கும் அரிவாள் வெட்டு விழுந்தது. ஷைனி மற்றும் அவரது தாயாரின் கூக்குரல் கேட்டு அக்கம் பக்கத்தினர் ஓடிவந்தனர்.

பொதுமக்கள் ஓடி வருவதைப் பார்த்ததும் சாஜி அங்கிருந்து தப்பி ஓடிவிட்டார். ரத்த வெள்ளத்தில் மிதந்த ஷைனி மற்றும் அவரது தாயாரை திரூர் அரசு ஆஸ்பத்திரியில் கொண்டு சேர்த்தனர். அங்கு அவருக்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி ஷைனி பரிதாபமாக இறந்தார். ஷைனியின் தாயாருக்கு தொடர்ந்து சிகிச்சை அளிக்கப்படுகிறது.

ஷைனி கொலை குறித்து திரூர் போலீஸ் துணை சூப்பிரண்டு செய்தாலி உத்தரவின் பேரில் போலீசார் அதிரடி நடவடிக்கை மேற்கொண்டனர். தலைமறைவாக இருந்த சாஜியை சிறிது நேரத்தில் கைது செய்தனர்.